نقطة ضعفي من إزازي
شوف قلوب عم بتنكسر
ودمعة تشتي عشباكي
فيها وجع مجبول قهر
يمكن ذنبو إنو تعذب
مهدد من سلاحو تشرد
من ثقة وثقافة تغرب
من دوا وجرح مجلد
حرامو انحرم إنو يغطي
إعصار ومين قال في نهار
بتشرق شمسو عالصبي
حتى مش هم اﻷسرار
الكبار فوق راسن خيمة
خطط وتنظيم المسار
شي يمين، وشي عشمال
وتقصيم الرزقة حلال
بس يا خوفي من الخيال
ما ياخد حقو رسمال
بكرا جايي العيد بينطر
قاعد عحفاف الخريف
ناطر فرج عصوت المطر
وابن عمو الفرح السخيف
اللي ألوانن بلون الكذبة
مخابية بطرف اﻷحقاد
وباﻵخر في آخر خبرية
ممكن تحمل باﻷعياد
بسمة أو حتى كلمة
أو حتى لمسة محبة
خبزة ولقمة كرامة
ورشة من صلاة الرحمة
تيزهر ربيع الجايي
زهرة وطن بميلاد اﻵية.

جورج مفوض
26.11.2015

 

Image Source : http://www.dailypainters.com

Advertisements